नर्रा  नर्रा  मैं  हार   गओ
मोरी  बात  सुनत  नईंया
मनकी बात कहत नईंया

जबसें आओ हे खैतन सें
कठवा बैला लय जौतन सें
ऊंगो  ऊंगो  जो  बैठो  हे
पैले  जैसौं  लगत  नईंया
मनकी बात कहत नईंया

हफ्ता भर में ब्याव मोडी को
सूत चुकाने हे करोढी को
खैतों से कछु नई निकरो
पानी टेम पे गिरत नईंया
मनकी बात कहत नईंया

खून पसीना एकई करके
दिनई रात  देखई  करके
कछु फसल जो हाथे आई
मंडी में भाव मिलत नईंया
मनकी बात कहत नईंया

भीड़ लगी काये खोरन में
बैठे  रोबे  सब  दोरन  में
ओके घरे आफत आ गई
बेवजे कोऊ  मरत नईंया
मनकी बात कहत नईंया

अर्थी उठ रई फिर किसान की
दुनिया  समझे  अनजान की
जो  हालत  में  हम  रेत  हे
ओ  में   कोऊ  रहत  नईंया
मनकी बात  कहत  नईंया

का अनहोनी जा होन लगी
धरती मईया अब रोन लगी
जैंसौ दर्द किसान सहत हे
बैंसौ दर्द कोऊ सहत नईंया
मनकी बात कहत नईंया

नर्रा  नर्रा    मैं  हार   गओ
मोरी    बात  सुनत  नईंया
मनकी  बात  कहत  नईंया

"जय कुमार "25/05/18